Ég hef alltaf lent í vandræðum með hvað er best fyrir mig að gera og hef ekki fengið mikla hjálp, því enginn vill mæla með neinu, sérstaklega læknar og hef ég því mikið þurft að prófa mig áfram. Svo fyrir fólk í sömu stöðu þá ákvað ég að skrifa svona lista.. hann hefði hjálpað mér í gamla daga :-)
Ég tek það þó fram að þetta er það sem ég hef upplifað og hentar mér, sem þýðir alls ekki að það sama henti þér ef þú þjáist af bakverkjum ;)
En í hnotskurn þá mæli ég með að reyna að komast inn á Reykjalund eða finna sjúkraþjálfara til að kenna inn á djúpu vöðvana og æfingar í kringum það og gera þær daglega, þó þær séu grútleiðinlegar. Einnig að ganga mikið og fara í ræktina.
:: En fyrst smá um mig :-) ::
Ég hef fengið tvö brjósklos (Miðjubungandi diskur L4-L5, L5.S1) sem byrjaði þegar ég var á 16. ári (1996). Annað brjósklosið var tekið í febrúar 2010. Ég fór til margra lækna fyrstu 2-3 árin en ekkert sérstakt fundu þeir að mér, fyrr en loksins að ég var send í sneiðmyndatöku. Haustið 2000 fékk ég svo annað brjósklos.
Frá 1996-2000 fékk ég í bakið af og til, sérstaklega við mikla setu og álag en ég átti alveg góða tíma líka, góðu tímarnir voru sennilega fleiri en slæmu tímarnir. Frá 2000-2004 var ég að drepast í bakinu alla daga, ég gat ekki setið mikið, ég þurfti að gleypa mikið af verkjatöflum ef ég ætlaði í bíó, í partý, út að borða, í leikhús, keyra lengi og svo framvegis. Ekki mjög skemmtilegt líf. Ég fann talsverðan mun á mér í ágúst 2004 en ég gat farið að stunda vinnu og félagslíf og lifað tiltölulega eðlilegu lífi. En þetta entist til apríls 2008. En þá flutti vinnan með tilheyrandi yfirvinnu og burði á hlutum og allt fór í rugl aftur. Ég hætti að vinna m.a vegna þessa í byrjun árs 2009 og eyddi gífurlegum tíma og pening í að reyna að koma bakinu í lag sem gekk ekki betur en svo að ég endaði á að fara í brjósklosaðgerð í febrúar 2010.
Bakverkirnir lýsa sér aðallega þannig að ég get ekki setið mikið, staðið mikið, legið mikið, gengið mikið… s.s ég þarf eiginlega að búa í svona þyngdarleysi því alveg sama hvernig ég reyni að skipuleggja daginn með að reyna að gera hæfilega mikið af þessu þá eru helvítis bakverkirnir alltaf þarna, bara misslæmir. Svo get ég orðið alveg svakalega skökk.
:: En þetta hefur allt skánað eftir bakaðgerðina og eftir að ég byrjaði í ræktinni og að gera djúpvöðvaæfingarnar.
:: Brjósklosaðgerð ::
Sjá hér.
:: En hérna kemur listinn yfir það sem ég hef prófað ::
:: Meðferðir ::
Sjúkraþjálfun (1997, 2000, 2003-2004, 2009) – Lítill ávinningur
Ég hef farið til nokkurra sjúkraþjálfara í gegnum tíðina en ekki fengið neina bót að ráði. Tel ég aðalástæðu þess vera að ég hafi ekki lent hjá nógu góðum sjúkraþjálfara. Ekki fyrr en ég fór á Reykjalund og lærði allt um djúpvöðvakerfið. Ég mæli með að velja vel sjúkraþjálfara.
Kírópraktor (2001-2003) – Lítill ávinningur
Ég prófaði kírópraktor og líkaði vel. Var hjá honum frá júlí 2001 til apríl 2003 og fann alveg gífurlegan mun á mér fyrst. En svo hætti ég því mér fannst þetta svo dýrt og enginn varanlegur bati.
St. Franciskusspítali (2003) – Lítill ávinningur
Ég pantaði tíma hjá Jósep Blöndal sem er læknir í Stykkishólmi. Hafði heyrt talað svo vel um hann og ákvað að það sakaði nú ekki að prófa að fara til hans. Ég fékk tíma hjá honum í enda maí 2003 og hann vildi leggja mig inn fyrir sumarlokun bakdeildarinnar. Ég komst inn síðustu 2 vikurnar (10.júní – 20. júní). Ég fór í sprautur hjá honum og var í öllu prógramminu þarna en fann engan mun á mér, eiginlega þvert á móti því bílferðirnar tóku sinn toll og aðgerðaleysið þarna því prógrammið á daginn var svo stutt. En margir sem hafa farið þarna hafa fundið stór mun á sér. Þetta bara hentaði greinilega ekki fyrir mig.
Trimform Berglindar (2008) – Enginn ávinningur
Ég keypti mér 10 tíma kort og fann enga breytingu.
Bowen (2008) – Enginn ávinningur
Ég fór í tvo tíma og fann enga breytingu. Fannst þetta of dýrt til að halda áfram.
Svæfingalæknir – Sprautu- og nálastungumeðferð (2008, 2009) – Mikill ávinningur
Ég fór til Björgvins Óskarssonar svæfingalækns í Suðurveri. Ég hef farið nokkrum sinnum til hans og þetta hefur borið misgóðan árangur en stundum hefur þetta alveg bjargað lífi mínu. Ég t.d komst í utanlandsferð sem ég hefði ekki komist í án þessarar meðferðar. En svo var ég orðin of slæm og hann pantaði tíma hjá skurðlækni fyrir mig.
Hreyfing – Mikill ávinningur
Í júlí 2008 fékk ég mér hund (tík sem fékk nafnið Ronja og er Cavalier) til að hafa félagsskap í gönguferðum mínum, frekar leiðinlegt til lengdar að vera alltaf einn í göngutúrum og maður nennir frekar í göngutúr ef maður hefur góða ástæðu eins og að viðra og vera góður við hundinn sinn ;-) Ég hef almennt verið dugleg í gönguferðum síðan.
Ég byrjaði í ræktinni 2010 og byrjaði í Hot yoga sem á að vera rosalega gott fyrir bakið, ég á voðalega erfitt með margar æfingarnar, sérstaklega allar frambeygjur. En mér líður vel í þessum tíma, þetta á voðalega vel við mig og ef ég missi úr tíma þá er ég hálf ónýt! Hér má sjá hve oft ég mætti 2010. Svo byrjaði ég í þolþjálfun í mars 2011. Sem hafa vakið lífslöngun mína og gert heilmikið fyrir bakið.
Reykjalundur 2011 – Mikill ávinningur
Loksins kom að því að ég fór á Reykjalund (sjá hér), ég hefði viljað fara þangað fyrir svona ca 14 árum síðan! En af einhverjum óskiljanlegum ástæðum fann enginn læknir hjá sér þörf til að benda mér þangað. Þetta finnst mér vera stóri gallinn við íslenska heilbrigðiskerfið, læknum er oft voða sama um sjúklingana sína. Verkjaskjólinn hjá þeim er algjör snilld og líka kennslan hjá sjúkraþjálfara. Ef þú liggur í rúminu í viku, þá ertu þrjár vikur að ná sama styrk aftur.
!! Djúpvöðvaæfingar: Reykjalundur leggur rosalega mikla áherslu á að koma djúpu vöðvunum í gang en þeir fara víst allir í frí hjá fólki með langvarandi bakverki. Hjá venjulegu fólki fara þeir t.d í gang þegar það réttir upp hönd en hjá okkur er höndin komin langleiðina upp þegar eitthvað fer að gerast hjá þeim. Ég er komin með æfingar sem ég á að gera á hverjum degi og það mun taka ca 3-12 mánuði fyrir þá að komast á ról. Ég er búin að gera þessar æfingar daglega í um 1,5 mánuð núna (15. apríl) og mér finnst ég finna mun. Ég er líka búin að vera rosalega dugleg í ræktinni. Ég er ekki frá því að ég hafi ekki verið svona góð í bakinu í 16 ár. !!
:: Annað ::
Bakbelti
Ég keypti mér einhverju sinni bakbelti hjá Össur og það virkaði fínt.
Hitapokar/kælipokar
Hitapokar eru fínir til að lina sársaukann en samkvæmt kírópraktórnum mínum þá vill hann bara að ég noti kælipoka og ég náttúrulega hlýði honum :-) Kælipokar minnka bólguna við hrygginn en hitapokar ekki. Ég reyndar nota hitapoka talsvert þegar ég er sem verst.
Rúm og annað
Ég fór í Betra bak og keypti mér tempur rúm (sem var of hart fyrir mig og á nú heima í sveitinni hjá mömmu), ég sef nú í boxdýnurúmi sem hentar mér vel. Ég þarf að sofa í mjög mjúku rúmi til að líða vel en pabbi sem þjáðist af brjósklosi líka vildi mikið harðara rúm.
Tempur ferðamjóbaksstuðningspúða – algjörlega bjargað mér
Ég keypti Tempur ferðamjóbaksstuðningspúða sem ég hef í bílnum, skrifborðsstólum og tek með mér í leikhús og bíó og svo framvegis. Gæti ekki lifað án þeirra! Það er eflaust hægt að finna einhverjar aðrar bakstoðir sem virka jafn vel.
Ecco skór – algjörlega bjargað mér
Ég hef átt Ecco sandala síðan 2000 og úff þeir hafa bjargað lífi mínu, ég fæ heiftarlega í bakið eftir mjög stutta stund í öllum öðrum skóm, svo ef ég þarf að standa lengi eða ganga lengi þá verða þessir fyrir valinu. Ég tek þægindin fram yfir flottheit (verst að þetta tvennt fer nánast aldrei saman!).
Verkjatöflur
Ég hef verið á Voltaren Rapid, Ibufen, Ibumetin, Dolvipar og Norgesic.
Þar af finnst mér Norgesic áberandi best, er bara nýbúin að fá það en það er víst gefið sem gigtarlyf. Voltaren Rapid er líka alltaf í töskunni minni, ég á það til að verða dálítið þreytt af Norgesic. Svæfingalæknirinn vildi meina að Norgesic og Parkódín Forte væri betra en Voltaren Rapid. En ég reyni að taka sem minnst af lyfjum, þau minnka verkina ekki það mikið.
:: Fræðsluefni ::
Bókin um bakið
Upplýsingabæklingur fyrir bakaðgerð
Ber er hver að baki – brjósklos á Íslandi
—-
Síðast uppfært 15. apríl 2011.
Ég er ekki með brjósklos en jóga er ótrúlega gott við bakkvillum. Hef heyrt að brjósklos geti gengið til baka við ástundun þess.
Ég held að yoga Shala (yogashala.is) sé ein besta jógastöðin á Íslandi. Vona að það hjálpi þér.
Kær kveðja
-Íris
Takk fyrir þetta, ég skoða þetta :-)
Takk fyrir að taka þetta saman svona skilmerkilega, hverju mælir þú helst með ,ef þú ættir að nefna eitt, af öllum þessum meðferðum ? Og hvar fékkstu mjóbaks-koddana ? Ég er með brjósklos og ég er búin að fá svo mörg ráð frá vinum og vandamönnum að ég er orðin snarrugluð. Já eitt annað, hvað kostar að fara í meðferðina hjá Jósep í Stykkishólmi og er það þannig að maður fari heim um helgar. Ég get varla setið í bíl í 2 min. hvað þá 2 klukkutíma. Hefurðu aldrei farið á Reykjalund ? Það eru margir að stinga upp á því fyrir mig. En sem sagt ég veit ekki hvað ég á að gera, læknirinn segir að ég eigi bara að ganga þetta úr mér en ég finn svo til niður í aðra löppina svo að það er mjög sárt og erfitt og mér finnst ég bara versna við að ganga.
Kv. Anna
Engar þessar meðferðir hafa gagnast mér til lengri tíma, því miður, svo ég get eiginlega ekki mælt með neinu. Björgvin svæfingalæknir bjargaði mér oft þegar ég var rosalega slæm í bakinu, hann hefur reynst mér best eiginlega. En oft virkuðu meðferðirnar ekki á mig. Eyþór sjúkraþjálfari fannst mér rosalega góður en hann er líka rosalega dýr og meðferðirnar virkuðu bara á milli tíma hjá honum. En þetta er svo rosalega persónubundið, það er helsti gallinn.
Þetta eru púðarnir sem ég nota í bíl og bíó o.fl. En ég reyndar oftast brýt þá saman, en hef ekki þurft þess í skrifstofustólum. Þeir hafa hækkað svakalega í verði, kostuðu um 4 þús þegar ég keypti þá fyrir kreppu.
Meðferðin í Stykkishólmi kostar ekkert minnir mig, þú getur verið á deildinni um helgar en það fóru allir heim nema einn þegar ég var þarna, mér fannst ekki spennandi að vera þarna um helgina og keyrði einmitt á milli, sem fór gífurlega illa í bakið á mér.
Ég er á biðlista eftir Reykjalundi og fer í forinnlögn í janúar.
Ég hef voða sjaldan fengið einhverja verki/doða niður í löpp, það er aðallega þegar ég er sem verst og allt er bara orðið stíft og fast. Svo ég hef sem betur fer oftast getað gengið eins og ég vil. Stundum var ég voðaleg slæm og átti erfitt með gang, þá var mér ráðlagt að fara bara styttra en oftar.
Núna er ég að stunda Hot Yoga og er að binda vonir við að það gagnist mér vel.
Hæ og takk fyrir allar þessa upplýsingar. Maður hefur einmitt verið að reyna að finna upplýsingar á netinu um brjósklos en þar er bara alls ekki mikið að finna. Ég greindist einmitt með brjósklos núna í haust. Síðasta árið fyrir greiningu hafði ég verið að fá þursabit hvað eftir annað. Þau geta verið vísbending samkv. minni reynslu. Er með 1 lítið og annað mjög stórt los. Þegar ég var sem verstur þá gat ég nánast ekkert gert. Gat ekkert setið, gat varla gengið (hægri fót náði ég bara að setja um 20° fram), gat mjög lítið staðið en ég gat legið í einni ákveðinni stöðu þar sem mér leið vel. Þetta þýddi að ég var nánast rúmliggjandi í 2 vikur og ég þarf líklega ekki að taka fram að þetta voru ekki bestu 2 vikur lífs míns :) Ég var með mikinn leiðniverk niður í gegnum rasskinn og alla leið niður í kálfa. Þessi taugarótarverkur er agalega sár og samkvæmt minni reynslu þá virka verkjalyf ekkert á svoleiðis….í það minnsta greindi ég engan mun. Ég var auk þess mjög dofinn í kálfa, með stanslausan náladofa niður í tær og fékk líka krampakippi í nánast allan fótinn (bara væga og ég myndi lýsa þeim eins og fjörfisk en bara í fætinum). Eftir að ég skánaði aðeins þá fann ég fyrir máttleysi í fætinum og þá aðallega kálfanum. Ég reyndi að snúa til baka í mína kyrrsetuvinnu eftir nokkrar vikur sem olli því að ég versnaði all svakalega og var frá í 2 vikur í viðbót. Eftir það hefur batinn verið nokkuð góður og vonast ég til að geta farið að stunda reglubundnar markvissar æfingar á næstu vikum. Markmið nr. 1 er að geta farið að stunda áhugamálið mitt aftur næsta vor en það er golf. Fékk einmitt brjósklosið á golfvellinum :) Ég er í vinnu þessa dagana og virðist þola það núna. Ég hef verið viðkvæmur í baki frá því ég var unglingur í rauninni og gerði aldrei neitt í því….kannski voru það mistök að leita ekki strax til sérfræðings. Hver veit, kannski hefði maður þá ekki lent svona illa í því ef maður hefði ekki verið þessi þrjóska týpa. Mæli með því að fólk leiti sér aðstoðar strax ef krónískir bakverkir eru að plaga það. Þá er ég ekki endilega að tala um heimilislækni því að þeir gefa bara lyf og senda fólk heim. Vildi bara deila minni reynslu líka, mér líður betur ef ég næ að tala eitthvað um þetta helvíti sem getur gert 35 ára gamlan mann að algerum aumingja :)
sæl. er að kljást við sama vandamál og þú með bakið. hvað varð til þess að þeir vildu loksins skera þig. kv. Guðjón.
Takk kærlega Jói fyrir að deila reynslunni :-) Ég mæli eindregið með Reykjalundi, ég er voða sátt við dvöl mína þar og þeir leggja áherslu á að sleppa verkjalyfjum og vinna í að koma djúpu vöðvunum í gang.
Guðjón: Ástæða þess að þeir vildu skera þetta var að brjósklosið var orðið svo risastórt, ef það hefði stækkað meira þá hefði það getað valdið varanlegum skaða.
Flott grein hjá þér Linda. Ég er einmitt sjálf 24 ára gömul og ekki gaman að standa í þessu! Ég fékk brjósklos í mars 2010 og var skorin í júní sama ár. Aðgerðin bjargaði mér algjörlega! :) Gangi þér vel.
Sæl ég er ekki með brjósklos en er frekar aum í bakinu eftir grindargliðnun….En ég rakst bara á þessa síðu hjá þér þar sem ég var að google upp púðum í skifborðsstól….langaði að benda þér á að prufa orkuplásturinn og verkjaplásturinn frá lifewave….Fólk hefur verið að losna alveg við verki…..það kostar ekkert að skoða þetta…
kveðja Elísabet