Linda Rós 3.0

Ég fékk í dag æðislegasta bréf sem ég hef nokkurn tíman fengið og það var meira að segja venjulegt bréf ekki e-mail ! Þegar ég kom í sjoppuna kom Ásdís með bréf til mín, Til fyrirmyndar bréf. Ég er enn brosandi út að eyrum !

Ég er orðin vinsæl hjá nokkrum krökkum hérna í hverfinu, einn daginn komu 2 vinkonur, önnur var í um 4 tíma, hin í 3, svo kom bróðir þessarar fyrri og var í örugglega klukkutíma. Daginn eftir kom stelpan aftur og var í örugglega um 1,5 tíma. Svo kom bróðirinn í gær (dinglaði upp á rúmlega 11, eftir 5 tíma svefn hjá mér!) og var með stelpu með sér og þau voru hérna í örugglega 1,5 tíma.

Það er alveg magnað hvað börnum finnst skrýtið að kvenmaður á mínum aldri skuli búa ein og vera ógift (ekkert samt um að ég sé barnlaus). Ein stelpan spurði hvort ég byggi ein og ég svaraði já, þá spurði hún af hverju, hvort ég vildi ekki gifta mig og sagði svo að ég gæti gifst kærasta frænku hennar því hann væri ekki nógu góður fyrir hana því hann væri svo ljótur ! Önnur spurði svo svipað, hvort ég byggi bara ein og af hverju ég ætti ekki mann, fékk alveg svona augnráð eins og ég væri eitthvað viðrini ! ;-)

Ég skráði mig á formspring.me (fólk getur spurt mann þar spurninga nafnlaust og órekjanlegt) um daginn einhvern tíman þegar ég hafði ekkert þarfara að gera og fékk áhugaverða spurningu þar: “Hvað er málið með alla þessa strákavini sem þú átt?”

Ég svaraði þessu svona: Vá hvað ég átti erfitt með að svara þessu. Er þetta eitthvað óeðlilegt ? Ég vil meina að strákur og stelpa geti vel verið vinir án þess að það sé eitthvað í gangi á milli þeirra, því miður verður það oft flókið þegar annar aðili á maka sem skilur það ekki. Í gegnum tíðina hafa flestir af mínum bestu og nánustu vinum verið strákar. Ég er og hef alltaf verið voða mikil strákastelpa (lék mér t.d aldrei með dúkkur eða í þessum helstu stelpuleikjum og finnst einstaklega leiðinlegt að fara í búðir. Slúður, drama, tíkarskapur og leikaraskapur fer gífurlega í taugarnar á mér og er því miður mikið algengari hjá stelpum en strákum). Ég held ég hefði átt að fæðast sem strákur og held ég hugsi oft frekar eins og strákur en stelpa.

Ég er frekar hissa á hve margir eru hissa á þessu… ég þekki fullt af stelpum sem eiga fullt af strákavinum, bæði einhleypar og í sambandi !

Annars er ég voðalega hissa líka á hvað ég fæ mikið af dónalegum (kynferðis) spurningum !

Ég á það til að tjá mig dálítið með hljóðum, sem ég hef ekkert pælt sérstaklega í fyrr en vinur minn fór að kommenta á þetta. Ég fór svo að tala við mömmu um þetta og hún alveg “hey já það er alveg satt”. Skondið að vera að pæla í þessu, ég er bara svona one of a kind !

Ég ætti nú kannski að útskýra þetta eitthvað betur en veit nú ekki hvernig, en t.d um daginn var mér kalt og ég kom inn í bílinn og gaf frá mér ííííí hljóð og sagðist vera kalt…. þegar ég er að teygja mig eftir einhverju og næ ekki þá gef ég frá mér öðruvísi í hljóð…. æj þið kannski takið eftir þessu einhvern tíman þegar þið umgangist mig :Þ

Ég átti erindi á gamla vinnustaðinn minn í dag. Ég var frekar kvíðin fyrir að mæta, ekki komið þarna síðan í ca febrúar í fyrra. En það var voða gaman að hitta gömlu vinnufélagana aftur. Flestir knúsuðu mig og kysstu og margir sögðust sakna mín og nokkrir spurðu hvort ég væri ekki að koma aftur. Ég er alveg á því að þetta sé einn besti vinnustaður landsins. Allir svo voða indælir. Ég hafði ekki hitt flesta síðan ég hætti í fyrra en mér fannst eiginlega eins og ég hefði hitt þau bara í gær. Þetta var eiginlega bara eins og að koma “heim”.

Það verður nú að viðurkennast að ég var smá kvíðin fyrir því að verða þrítug. Fannst einhvern veginn að líf mitt ætti að vera í betri skorðum, komin á þennan aldur. Ætti að vera í góðri vinnu, eiga íbúð og bíl, eiga mann og börn og svo framvegis… mig skortir þetta allt. En hey ég á hund !

En ég ákvað svo bara að endurhugsa þetta og nú er ég bara nokkuð ánægð með að vera búin að ná þessum aldri. Ætla að líta á þetta sem nýja byrjun, síðustu 10 ár voru ekki nógu góð, andlega, líkamlega og félagslega. En núna er ég búin að vinna svo mikið í andlegu hliðinni og búin að fara í 2 aðgerðir út af líkamlegu kvillunum (3 ef við teljum augnlaseraðgerðina með) og ég gerði alltof lítið félagslegt síðustu 10 árin, sem má t.d augljóslega sjá á að ég fór á mitt fyrsta ball í 10 ár um daginn og í mitt fyrsta gítarpartý og svo framvegis.

Svo ég er bara ánægð með þetta !

Ætla sérstaklega að einblína á að vera ekki hrædd við nýja hluti, lifa eftir reglunni sem ég setti mér á síðasta ári: “reyna allt einu sinni (innan skynsamlegra marka)”

Eins og margir sem þekkja mig hafa tekið eftir þá er ég mjög oft með myndavélina á mér til að taka myndir af hinu og þessu og get alveg tapað mér. Ekki get ég nú sagt að ég sé sérfræðingur, er alltaf með á auto bara. Mig hefur lengi langað til að læra aðeins ljósmyndun, ekkert til að verða einhver fagmanneskja, heldur bara að læra aðeins meira á stillingar og læra að vinna myndirnar aðeins í tölvunni. Vinur minn ætlar að taka mig í smá kennslu, annars ætla ég að hafa auga með einhverju sniðugu námskeiði.

Mig langar líka í góðar myndir af mér, flestar myndirnar sem ég á af mér sem eru góðar voru teknar á baðherberginu í síðasta húsnæði því þar var besta ljósið. S.s baðflísar á þeim öllum og á stöku má sjá baðtækin ! Ég er því miður ekki ein af þeim sem myndast vel, þvert á móti, svo flestar aðrar myndir af mér eru skelfing ;-) En einstöku útivistarmynd hefur tekist vel :-)

Skv WordPress Stats sem segist ekki telja mínar eigin heimsóknir á þessa síðu hafa verið 98 heimsóknir á hana ! 98 ! og klukkan er bara 15:08 !

Það hlýtur einhver að vera öflugur á refresh takkanum eða allar leitarvélar heims kíkt hérna inn því ég þekki ekki 98 manneskjur sem lesa bloggið mitt né trúi að svo margar manneskjur hafi áhuga á því ;-)

Update: Dagurinn endaði í 162 heimsóknum

Ég vona að þetta sumar verði gott veðurfarslega. Mig langar að gera helling. T.d
- Göngutúrar
- Útreiðatúrar
- Fjallgöngur
- Ferðast (hvort heldur sem er dagsferðir eða lengra, helst bæði!)
- River Rafting í austari Jökulsá
- Hellaskoðanir
- Dansa
- Hitta fólk
- Grilla
- Deita
- Synda/vaða í vatninu í Arnarfelli ef það verður nógu hlýtt úti
- Fara í sumarbústað
- Jeppaferð
- Snjósleðaferð / fjórhjólaferð eða eitthvað í þeim dúr
- Leikhús
- Söfn
- Sund
- Heita laug
- Gay Pride
- Leikhús
- Sjósund
- Keila

… og örugglega eitthvað fleira sem mér dettur ekki í hug núna… hverjir eru memm ?! Mig vantar klárlega mann / vini / öflugan vinahóp sem er til í allt og áreiðanlegir !

Ef þið hafið einhverjar hugmyndir um skemmtilega staði nálægt höfuðborginni þá vantar mig alltaf hugmyndir !

Ég er búin að uppfæra mig, er orðin Linda Rós 3.0 og annað eins eðal eintak hefur bara sjaldan sést !

Ég uppfærði upp í Linda Rós 2.0 þegar ég fór að takast á við kvíðann og núna þegar bakið virðist vera komið í lag þá var kominn tími á að uppfæra í Linda Rós 3.0. Ég veit nú ekki hvort það munu verða fleiri uppfærslur, en maður á nú alltaf að reyna að bæta sig !