Linda Rós 3.0

Ég er upp í rúmi að horfa á videó, Ronja er sofandi inni í búri ! Er asnalegt að vera sár yfir því að hundurinn manns vilji frekar sofa inni í búri en uppí hjá mér ?! Reyndar er þetta eiginlega einsdæmi, gerist allavega voða sjaldan. Held hún sé fúl út í mig yfir stuttum og hægum göngutúrum og rigningunni ! ;-)

Hún Ronja er alveg svakaleg, hún tuskast með kisurnar og hömpast á þeim og þeir láta sér það alveg lynda, á endanum forða þeir sér nú. En þetta er svakalega fyndið, ég þyrfti að ná videói af þessu til að sýna ykkur !

Annars hefur nú mest bara verið skotin í Róberti bróður og hömpast á honum, hefur gert það við einn annan karlmann og einu sinni smá við mig.

Spurning hvort það sé til kynfræðslumyndband fyrir hunda ?

Ég fór með Ronju til dýralæknis í dag í árlega sprautu og ormahreinsunartöflu. Ronja var náttúrulega frekar ofvirk og óhlýðin á dýralæknastofunni, eins og hún er alltaf á stöðum utan heimilisins og í kringum fólk/dýr/hluti sem hreyfast ofl. Dýralæknirinn spurði hvort ég vildi setja hana á lyf til að róa hana niður, skilst það sé nokkurs konar hunda rítalín. Ég tók töflurnar en ég hef nú ekki enn kunnað við að gefa Ronju þær… Tók mig tíma að komast á það stig að klæða hund í föt (eitthvað sem ég hélt ég myndi aldrei gera) og þarf greinilega tíma til að komast á það stig að fara að gefa hundi geðlyf.

Hún er alveg róleg í kringum þá sem hún hittir oftast og hérna heima við, en um leið og hún er komin út eða komnir gestir þá er athyglin alveg farin og hún vill bara hlaupa á eftir öllu. Ég hef marg reynt að kenna henni að labba við hliðina á mér, það gengur innandyra ef engin truflun er í smá tíma en ekki séns úti. Ef hún sleppur út þá er hún bara farin, eltir rollur, hesta og fugla til skiptir og ekki séns að hún hlýði manni.

Ég lifi í voninni að þetta eldist af henni, en hún er orðin 17 mánaða og varla hægt að kalla þetta hvolpalæti ennþá.

Úff hvað þetta veður fer í skapið á mér, maður nennir lítið út í göngutúra eða á hestbak í svona veðri. Mér finnst allt í lagi að vera mikið úti í rigningu en þetta rok sem er alltaf er ekki góð blanda með rigningunni. Svo maður verður einhvern veginn latari og þyngri og æj þarf að rífa mig upp úr þessu.

Aumingja Ronja greyið er ekki sátt, hana langar svo út, í sumar var hún rosalega mikið úti í bandi að dunda sér bara. Hún biður um að fara út, ég opna, hún lítur út og bakkar inn aftur og horfir svo á mig með þessum augum “af hverju ertu að hafa svona vont veður”. Svo er hún mikið æstari inni þegar hún kemst ekki mikið út.

Annars var ég að heyra um hund sem hefur verið greindur ofvirkur með athyglisbrest af dýralækni… ég er viss um að hún Ronja mín myndi fá þessa greiningu líka ;-)

Það var farið að detta undan hestunum svo Tóti kom í gær og fór yfir allt saman, hestana okkar og hestana hennar Vilborgar. Hann ætlaði upphaflega að koma á sunnudeginum og ég var búin að setja alla hestana inn í hesthús sem var vesen því þeir voru sloppnir úr tveimur girðingum (tveir af hestunum eru snillingar í að slíta girðingarnar), lagaði girðingarnar, fór og náði í hestana hennar Vilborgar og setti þá líka inn í hesthús, svo leið og beið og enginn Tóti kom. Hestarnir voru svo auðvitað voða stilltir í girðingunni þar til í gær þá sluppu þeir aftur út svo ég fór í gegnum alveg sama prógrammið og á sunnudaginn… en ég er svo mikil sveitastelpa í mér að þetta var bara fínt :D

En nú fer að verða síðasti séns að koma á hestbak ef einhverjir vilja koma, það eru alveg nokkrir búnir að koma í sumar (Ívar, Hafþór, Kristbjörg Helga, Hlynur, Bjössi, Kolbeinn, Ingvi, Ingvi, Brynhildur, Telma og vinkona, fólk sem mamma þekkir… held þá sé allt upptalið)

Ég var að keyra heim úr bænum um miðjan ágúst síðastliðinn og varð litið á rafmagnslínurnar, ég hef oft séð fugla á þeim en ekki svona gífurlegt magn. Svo ég var eins og ekta túristi og tók mynd ;)

Ronja er búin að vera að fara svo svakalega mikið úr hárum síðustu tvo mánuði og feldurinn orðinn lítill og grófur, búin að spá oft í að láta raka hana og lét af því verða í dag. Ég var nú hálf stressuð yfir þessu og mamma var nú ekki alveg að samþykkja þetta. En þetta kom bara mun betur út en ég þorði að vona.

Kettlingarnir sluppu inn um daginn án þess að ég tæki eftir og þeir fundu greinilega matinn hennar Ronju sem er geymdur í plastboxi, Börkur var greinilega svo gráðugur að hann stakk hausnum ofan í gatið á lokinu og festist ! Hann var ekkert að kippa sér upp við þetta, hafði allavega hlaupið upp tröppurnar svona og var alveg stilltur þegar ég var að taka þetta af honum.

Hún Ronja mín er enn rosalega ofvirk, ef hún sleppur út þá er algert pain að reyna að ná henni. Hún þýtur á eftir fuglum, hestum og rollum eins og enginn sé morgundagurinn. Ég get farið með hana í 6 tíma göngutúr án þess að hún þreytist að ráði.

Hún fór í pössun á laugardaginn og yfir nóttina því við mamma fórum í brúðkaup, sem byrjaði svo snemma og ég vissi ekki hvenær við myndum koma heim. Sú sem passaði hana sagðist ekki hafa séð ofvirkari hund.

Ég held að draumaeigandi hennar væri manneskja sem hlypi svona 10 km á dag með hana. Göngutúrarnir sem ég fer með hana í eru yfirleitt svona 1-1,5 klst, ég held ég geti alveg fullyrt að orka hennar minnki ekki neitt við þessa göngutúra.

Landverðirnir á Þingvöllum fundu þennan Toppandarunga í Öxará og björguðu. Þau töluðu við fuglasérfræðing sem vildi endilega að þau myndu gera allt sem þau gætu til að halda unganum á lífi, stofninn er víst búinn að vera frekar lélegur.