Linda Rós 3.0

Jæja ég ákvað að fjárfesta í Implanon (þetta er sko fjárfesting, litlar 26 þús krónur (samt 5 þús krónum ódýrara en í hinum apótekunum, Garðsapótek rokkar! og mikið ódýrara en pillan í 3 ár, pillan sem ég var á myndi kosta um 54 þús ef hún myndi ekkert hækka á þessum tíma) og þetta var sett í mig í gær. Er með stóran marblett því til sönnunar.

Ég fékk svona kort með þessu, mér fannst það rosalega fyndið. “Athugið: Eigandi spjaldsins er með vefjalyf til getnaðarvarna”. Ég er svona að spá hver hugmyndin með þessu korti sé… hvort þetta sé til að auðvelda manni að draga heim karlmenn af djamminu eða hvað ? *blikka gaur* “bjóða mér í glas” *veifa korti* “koma með mér heim” *veifa korti* (bara svona til að valda ekki misskilningi þá hef ég ekki og mun ekki nokkurn tíman draga ókunnugan karlmann heim af djamminu!)

Mér svelgdist á áðan og hóstaði náttúrulega í kjölfarið og festist í bakinu ! Var í vanda að klæða mig í sokkana og svona. Ég sem vonaðist til að þurfa ekki að upplifa svona tíma aftur, vonandi lagast þetta fljótt.

Update: Er s-laga í dag (mánudagur).
Update: Er minna s-laga í dag (þriðjudagur).

Það er búin að vera einhver lægð yfir mér síðustu daga, engin sérstök ástæða fyrir því samt. Er bara búin að vera mikið kvíðin og lítil í mér og viðkvæm. Alveg óþolandi ástand. En ég held ég væri mikið verri ef ég hefði ekki lært svona mikið í HAM. Þetta líður hjá og þetta gerist hjá öllum. Ég er búin að vera að vinna mig út úr þessu, hef samt verið að leggja mig aðeins á daginn sem ég var annars löngu hætt, en aftur á móti þá hef ég bara vaknað fyrr almennt í vikunni. Var tvisvar komin á fætur klukka 9 !

Svo finnst mér erfitt að blogga um þetta því ég “á” alltaf að vera í góðu skapi og hress og kát. En það er bara enginn þannig og af hverju má ég ekki vera eins ?

Sem betur fer eru mánuðir síðan ég var svona síðast !

Ég gerði móður mína alveg miður sín í gær þegar ég sagði henni að ég væri að spá í að láta setja í mig hormónastafinn sem er getnaðarvörn fyrir næstu 3 árin ! Ég var voðalega á báðum áttum með þetta allt saman en ég þarf að fara á getnaðarvörn því ég er að fara að byrja á lyfjum sem ég má alls ekki verða ólétt á og það má ekki gefa konum það nema þær séu á getnaðarvörn. Ég er skelfileg í að muna eftir pillunni og hún er líka orðin rándýr. Ég get heldur ekki hugsað mér að eignast barn fyrr en eftir allavega 1-2 ár í sambandi svo líkurnar á að ég stefni á barnseignir næstu 3 árin eru hverfandi. En ef það skyldi koma upp þá er alltaf hægt að taka þennan staf. Sumar sem fara á hann hætta að hafa blæðingar og hjá sumum stækka brjóstin. EF BARA ! Sjáum til hvernig það verður ;-)

Ég er búin að vera á báðum áttum lengi með þetta en ákvað að skella mér á þetta. Örlögin virðast vera hlynnt þessu. Ég hringdi í gær til að panta tíma hjá lækninum sem ætlar að setja hann í mig en þá er hann að fara í frí og alveg uppbókaður, ég spurði þá hvort það væri einhver annar læknir þarna sem gerði þetta og mér var ráðlagt að hringja bara í símatíma hjá þessum (sem var einmitt fyrir hádegi í gær, ég hringdi fyrst um 9 leytið, ég er yfirleitt aldrei komin á fætur um það leyti!). Hann ákvað að troða mér að á mánudaginn klukkan tvö. Ég gerði verðkönnun um daginn á þessu lyfi (þetta er svakalega dýrt lyf en aftur á móti ódýrara en að vera á pillunni, tala nú ekki um ef maður losnar við dömubindakostnað og svona). Ég fór áðan og ákvað að ef það væri búið að hækka lyfið í Garðsapóteki þá myndi ég sleppa þessu, en ég fæ hann á sama verði og búið var að gefa mér upp. En þá kom í ljós að lyfið var ekki til en ef þau panta það þá ætti það að koma klukkan 1 á mánudaginn ! Ég á pantaðan tíma klukkan 2 ! Eins og ég segi, held þetta sé bara meant to be ! Nú er bara að vona að þetta lyf fari vel í mig, er búin að vera að lesa aukaverkanalistann en það er eins með þetta lyf og önnur, gífurlega niðurdrepandi og hræðsluvaldandi lestur ! ;-)

Næsta föstudag er reunion hjá árgangnum mínum úr Kvennaskólanum, 10 ár síðan við útskrifuðumst. Ég er orðin svo svakalega stressuð að það er ekki fyndið. Ég er bara með í maganum núna við að hugsa um þetta. Linda Rós 1.0 hefði sleppt því að mæta en Linda Rós 3.0 fær ekki að komast upp með það. Þetta var fínn bekkur og allt það, en ég á svo skelfilega erfitt með að mæta í fjölmenni, sérstaklega þegar ég er ein að mæta ! En ég get þetta !

Update: Kvöldið var fínt, skrýtið að hitta þetta lið og finnast alls ekki eins og það væru komin 10 ár síðan ég hitti flest síðast. Fór að hugsa um það hvernig í ósköpunum mér datt í hug að fara í Kvennaskólann þegar mér hefur almennt alltaf lyndað betur við stráka og kosið félagsskap stráka frekar en stelpna !

Ég fann vel hvað ég var frekar félagslega fötluð og fátækur námsmaður í menntaskóla. Enda hef ég ekki haldið sambandi við neinn nema á facebook og örfáa á msn. Hápunktur vikunnar, matarlega séð, var að ég og ein vinkona mín fórum á Nonnabita og skiptum á milli okkar ódýrasta bátnum ! Ég einhvern veginn small heldur ekki í neinn hóp þarna. Var svolítið á flakki, var með þessum þessa vikuna og hinum hina vikuna.

Bekkurinn, eða 9 úr bekknum (Anna María, Sóley Unnur, Gunnar, Ríkey, Maggi, Ester, Brynhildur, Bjarki, og ég) hittumst heima hjá einni (Önnu Maríu) og við horfðum á myndband frá Dimission og frá útskriftarferðinni (sem ég fór ekki í). Vá hvað ég mundi lítið eftir Dimmissioninu. Við fórum svo í sal í Skeifunni. Þar var farið í “Speed dating”, allir fengu hálfa mínútu til að segja frá lífi sínu 10 árin og svo skiptu allir um sæti. Ég veit ekki hvað ég talaði við marga en það var alveg slatti. Talaði við marga úr einum bekknum og komst að því að ég kannaðist ekki einu sinni við þetta fólk, hefði getað svarið að ég hefði aldrei séð það áður !

Ég fór um hálf 2 leytið og við fórum 4 (Þóra, Jóhanna og Arna) út í Hagkaup því ein var svo svöng, ég skutlaði þeim svo öllum heim til sín og fór heim að laga til og var að því til um 4 um nóttina. Er ekki alveg eðlilegt að fara frekar heim að laga til en að fara niður í bæ að djamma ? ;-)

En ég er ánægð með að hafa farið, það var fínt að sjá þetta lið aftur.

Rifjaðist upp fyrir mér að ég var einu sinni kosin næstfyndnasta manneskjan í bekknum mínum !

Ég er enn að bíða með að heyra um bætur frá Tryggingastofnun, ég er búin að vera með heilsugæslulækni að vinna í þessu í 2 mánuði ! Ég held hann sé ekki enn búinn að sækja um þetta fyrir mig, því það er svo mikið að gera hjá honum. Fimmti mánuðurinn sem ég hef 0 kr. í innkomu ! Ég veit ekki alveg hvernig fólk sem á ekki sparifé á að lifa í þessu kerfi, sem betur fer hef ég alltaf verið sparsöm og lagt til hliðar. Svo hef ég ekkert heyrt ennþá frá Reykjalundi. Mér finnst frekar leiðinlegt hvað allt tekur langan tíma.

En ég er allavega að vinna í því sjálf að halda bakinu í lagi með sundferðum og daglegum gönguferðum !

Ég fór í sumarbústað með vini mínum í fyrradag, vinir hans voru í bústað rétt hjá Skálholti. Við vorum komin þangað um 10 leytið og við spiluðum Spurt að leikslokum og Partý & co. Fórum svo í pottinn og vorum þar í örugglega 2-3 tíma og þar var m.a spilað áfram Spurt að leikslokum. Fórum að sofa um 5 leytið sennilega.

Ég hef aðeins verið að spila Spurt að leikslokum og er alveg að fíla það spil. Skemmtilegar spurningar og heilmikill húmor í þeim. En mér finnst samt Trivial spilaborðið alltaf skemmtilegast. Það gæti verið gaman að nota spurningarnar úr Spurt að leikslokum við það bara. Ég stefni á að kaupa mér þetta spil á næstunni.

Partý & co er spil sem ég hef alltaf forðast eins og heitan eldinn og þverneitað að spila. En þar sem ég er öll í að ögra mér og gera nýja hluti þá lét ég slag standa. Þetta var skelfilega erfitt, en ég lét mig hafa það og ég gerði allt nema teikna en ætlaði nú að láta á það reyna líka en það gafst ekki tími til. Ég efast stórlega um að þetta muni einhvern tíman verða spil sem ég muni stinga upp á að verði spilað. Þetta er svo gífurlega langt út fyrir mitt comfort svæði (frammistöðukvíðinn, félagsfælnin, fullkomnunaráráttan ofl…). Að leika og teikna fyrir framan aðra og það með stundaglas í gangi ! En ég er mjög stolt af mér að hafa gert þetta og þetta mun örugglega vera eitt það erfiðasta sem ég hef gert á þessu ári.

Ég hafði aldrei hitt þetta fólk sem var í bústaðnum og mér fannst það voða lítið mál (annað en Linda Rós 1.0 hefði fundist). Spilaði skelfilegasta spil allra tíma, fór í heita pottinn í bikiníi, var með maskarann út um allt, var ómáluð daginn eftir og með hárið út í loftið. Allt langt út fyrir comfort svæði Lindu Rósar 1.0. Segi nú ekki að þetta sé á comfort svæði Lindu Rósar 3.0 en nær því !

En það var snilld að komast í sumarbústað ! Ég elska sumarbústaðaferðir ! Hugsaði einmitt fyrir helgina að mig langaði í sumarbústað !

Bakið á mér er ekki búið að vera nógu gott, ég fékk flensu um daginn og var ekki dugleg að fara í göngutúra þá. Ég er að vona að það sé bara málið…

Ég er búin að fara á 2 Coda fundi (CoDA – Co-Dependents-Anonymous / Nafnlausir meðvirklar). Ég hafði ætlað að fara síðan ég heyrði fyrst um þetta en lét aldrei verða af því. Ég hafði farið á 2 Al-Anon fundi sem mér fannst ekki henta mér. Svo ég var ekki endilega trúuð á að þessi hópur væri fyrir mig en ég fór svo með vini mínum sem hefur verið að fara á þessa fundi og leist bara vel á. Ég finn alveg hvað ég er orðin mikið meðvitaðri og minna meðvirk en ég var fyrir ca ári en á á mjög langt í land samt. Ég mæli hiklaust með þessum fundum. Þeir eru mörgum sinnum í viku, ég hef farið á þriðjudagskvöldum.

Einkenni
Coda bókin (hægt að kaupa hana á 1000 kr á Codafundum)

Read the rest of this entry »

Ég er búin að vera með kvefpest í næstum 3 vikur ! Ég mótmæli harðlega og er að spá í að fá nálgunarbann ! Er reyndar skárri núna en í byrjun en samt sko !