Ég hef nú aldrei verið sérlega skynsöm í matarræði, oft lifað á brauði og morgunkorni. Sérstaklega eftir að ég hætti í sambandi með gaur sem er snillingur í eldhúsinu og sá um megnið af eldamennskunni. En ég er alveg að slá öll met núna, ég er bara alltaf lystarlaus, langar ekki í neitt, oft óglatt og er bara að borða alltof alltof lítið. Þegar ég steig á vigtina um daginn, sýndi hún 51,4 kg. Ég held ég hafi ekki verið svona létt síðan í menntaskóla ! Skv BMI er allt undir 54 kg vannæring, ekki það að ég líti á BMI sem einhvern sannleika, en ágætis viðmiðun. Ég fór og keypti mér Build up pakka um daginn, hef gert það stundum í gegnum tiðina þegar ég fer á svona skeið. En ég er með eitthvað jafnvægisskyn sem veldur þessari ógleði, verð líka bílveik, flugveik, sjóveik ofl. Segi oft að ég verð dagsdaglega veik ;-)
Ef einhver veit um karlkyns einhleypan næringafræðing… eða karlkyns einhleypan snilling í eldhúsinu þá endilega beinið þeim til mín ;-)
Ég er alveg hætt að borða ýsu, nema ef mér er boðið upp á hana þá borða ég hana náttúrulega. En ég er búin að uppgötva töfraheima fisktegunda og núna er ég voðalega hrifin af keilu og löngu. Mamma var svo góð að bjóða okkur Rúnari út að borða á Lauga-ás í fyrradag og ég fékk mér blálöngu sem var ofsa góð. Keypti keilu í fyrsta skipti á síðasta ári og féll alveg fyrir henni, mamma kom svo um daginn með löngu handa mér og ég féll alveg fyrir henni. Þessar tegundir eru líka góðar upphitaðar daginn eftir, ég gæti ælt við að borða ýsufiskrétt daginn eftir.
Ég komst út úr húsi á föstudaginn, Kjartan vinur minn kom og sótti mig og við fórum og fengum okkur pizzu á Eldsmiðjunni, það var meira að segja afgangur af mínum helmingi sem fékk að koma með heim í kassa og var étinn í gær :-)
Horfðum svo á videó, fyrst á Star Trek: First Contact og byrjuðum svo að horfa á Robin Hood: Men in Tights en hún var á videóspólu og við gátum ekki spilað meira en ca korter af myndinni *hágrát*. Fórum þá að horfa á James Bond: Goldfinger. Vinur minn sofnaði yfir henni og hraut hástöfum, Ronja greyið vaknaði, reisti sig mygluð upp og horfði á orsök óhljóðanna með undrunarsvip !
Rosalega var gott að komast út úr húsi. Fólk sem kemur i heimsókn með mat, býður mér út úr húsi eða býður mér í mat er alveg pottþétt á vinsældalistanum þessa dagana. Liðu 8 dagar um daginn þar sem ég hitti engan !
Mér var boðið í Sushi af sætum stráki í dag. Ég hef aldrei verið sannfærð um að ég sé Sushi manneskja, sérstaklega ekki þar sem það er þari í þessu og það er grunur um að ég sé með þörungaofnæmi. En þar sem ég er að lifa eftir “prófa allt einu sinni” og að reyna að ögra mér þá ákvað ég að smakka (var alveg búin að gera honum grein fyrir að mér fyndist mjög ólíklegt að mér þætti þetta gott) og mér fannst þetta eiginlega alger viðbjóður. En ég get þó allavega sett þetta á listann yfir eitthvað nýtt sem ég hef prófað ! :-)
Ég fór á Saffran í hádeginu í dag, í annað skipti sem ég fer þarna. Mér finnst matseðillinn alveg gífurlega girnilegur þarna og langar eiginlega til að prófa allt ! Síðast fékk ég mér humarsalat, núna fékk ég mér kjúklingapizzu. Finnst reyndar leiðinlegt hvað það er svakalega langur biðtími þarna og svo er staðurinn ekki neitt voðalega kósý enda fórum við í heimahús að borða þetta.
Quote dagsins: Vel gert
Ég fór út að borða í gær á stað sem heitir Shalimar (indverskt/pakistanskt) og er í Austurstrætinu, ég hafði aldrei heyrt um þennan stað en hann hefur víst verið þarna í dágóðan tíma. Maturinn var mjög góður, ég fékk mér Murgh Madras Curry (Kjúklingur í Madras-karrý kryddsósu með rjóma og kóriander) og hvítlauks nanbrauð. Mæli hiklaust með þessum stað. Ef ljósin væru aðeins dimmuð og ekki alveg jafn þröngt á milli borða þá myndi hann vera enn betri.
Ég var að hitta strák sem ég hafði bara spjallað við á msn og hélt ég myndi fæ vægt hjartaáfall yfir daginn af stressi, en ég lifði af, augljóslega ;-) Skil ekki hvernig fólk getur stundað blind date hægri vinstri, ég yrði að fá ávísað róandi töflum allavega ! ;-)
Ég fór í fyrsta skipti á Lindina á Laugarvatni í gær, ótrúlegt en satt að hafa ekki gert það áður. Ég get nú ekki sagt að ég hafi verið hrifin, mér fannst maturinn ekkert sérstakur, sérstaklega miðað við verð (sem betur fer eiginlega var ég nýbúin að borða áður en ég fór), þjónustan léleg (t.d var bara hægt að lesa matseðilinn af einhverjum spegli en ekki hægt að lesa við borðið) og baðherbergið með flóðlýsingunni var ekki að heilla mig.
Þetta var samt gott kvöld, fór með 3 snarklikkuðum starfsmönnum Þjóðgarðsins, hefði viljað vera með myndavél til að taka myndir og videó af kvöldinu !
Mamma var svo góð að bjóða okkur Önnu frænku og Kalla út að borða á Caruso í vikunni. Þetta var í fyrsta skipti sem ég fór, mér fannst þetta fínt en féll ekki fyrir staðnum. Við fengum samt alveg svakalega gott hvítvín (Art Vitis, Riesling – Mosel).
Við fórum svo og fengum okkur öll bananaís í Erluís á eftir, en ekki hvað !
