Stundum líður mér svo fáránlega vel að mér finnst eins og ég gæti hreinlega sprungið af hamingju. Ég er samt ekki raunveruleikafirrt, lífið er bara þannig að það hefur sínar hæðir og sínar lægðir. En ég er loksins farin að kynnast hæðunum en ekki bara lægðunum!
Ég myndi segja að 95% af tímanum er ég í góðu jafnvægi, sátt við lífið og tilveruna, sátt við mig eins og ég er. Lífsgleði mín er almennt á skalanum 6-10, oftast í kringum 8, enda uppáhaldstalan mín. Áður fyrr fór hún ekki yfir 4,5, ekki hátt í 20 ár.
Það tók 3 ár frá því að ég náði botninum og reyndi að taka mitt eigið líf þar til ég fann þetta andlega jafnvægi. Ég upplifði 5 vikur síðasta vor en lenti svo alvarlega á botninum út af strák, og það tók mig rúmt hálft ár að ná andlega jafnvæginu alveg aftur. Ég missti nánasta vin minn til margra mánaða, alla nándina úr lífi mínu og var hafnað. Enginn tekur því vel, en eins og ég sagði í síðasta pistli, þá erum við sem erum með geðvandamál oft viðkvæmari fyrir, tökum stærri dýfur og þurfum lengri tíma til að jafna okkur.
Ég er viss um að ég hefði náð þessu andlega jafnvægi mikið fyrr ef ég hefði haft vit á því að fatta hve dásamlegt það er að vera einhleypur, ég er að uppgötva það í fyrsta skipti síðan ég fór að spá í strákum. Og ef ég hefði fengið þennan lista í hendurnar í byrjun ferlisins.
En það sem hefur hjálpað mér að ná þessum áfanga er m.a:
1. Að hreyfa mig, þá fyrst og fremst að stunda loftfirrtar þolæfingar. En einnig að fara í hot yoga, yoga og gönguferðir mér til ánægju og yndisauka.
2. Að taka lyfin mín. Það tók 9 ár að finna lyf sem virkuðu. En þau taka mesta kvíðahnútinn í burtu og hjálpa mér að sofa.
3. Að vera félagslynd. Vera dugleg að hitta vini og ættingja. Félagsleg tengsl eru mun mikilvægari en við gerum okkur grein fyrir. Einangrun er það versta fyrir okkur. Enda er skilgreining WHO á heilsu: líkamleg, andleg og félagsleg vellíðan.
4. Að læra að stjórna huganum. Með hugrænni atferlismeðferð (HAM), árvekni (mindfulness), slökun og hugleiðslu.
5. Að tjá mig. Ég tjái mig voðalega mikið á blogginu mínu, en einnig við vini, vandamenn og meðferðaraðila. Það er svo gott að tjá sig, það auðveldar manni að takast á við vandamálin og maður fær oft aðra sýn á hluti frá öðrum. Einnig tók ég mig til og skrifaði niður kvíða- og þunglyndissögu mína sem gaf mér góða yfirsýn og hjálpaði mér mikið. Maður verður að láta allt flakka, ekki fela neitt.
6. Að stunda áhugamál mín. Ég er hætt að eyða öllum mínum frítíma í að horfa á eitthvað og lesa eitthvað. Ég segi já við flestu sem vinir mínir stinga upp á og vildi óska að þeir stingu oftar upp á hlutum til að gera! Mig vantar félagsskap fólks sem er alltaf að gera eitthvað skemmtilegt og fjölbreytt, og helst oft eitthvað nýtt. Eitthvað sem ég virkilega hataði áður fyrr, en elska núna að gera og er orðið áhugamál.
7. Að eiga hundinn minn. Ég á yndislegan hund sem heitir Ronja og er Cavalier. Hún fer að verða 4 ára og ég er fullviss um að geðheilsa mín væri ekki svona góð án hennar. Hún er algjör kjölturakki, vill helst ekki vera lengi eða langt í burtu frá mér. Kúrir hjá mér í sófanunum og sefur hjá mér uppi í rúmi. Dýr bæta og kæta. Þau eru hinn fullkomni félagsskapur.
8. Að vera samviskusöm. Alveg sama hve mikið mig langar ekki til að gera eitthvað, þá er ég svo samviskusöm að ég geri það.
9. Að lesa sjálfshjálparbækur og tilvitnanir.
10. Að vera þakklát. Að hrósa öðrum. Að vera stolt af sjálfri mér. Að hafa húmor. Að brosa meira. Þetta virðast voðalega litlir hlutir en þeir eru stærri en maður heldur. Prófaðu að vera mjög kurteis og þakklátur í einn dag og hrósa sem flestum. Það er alveg ótrúlegt hvað það gefur manni, því maður fær þetta allt tilbaka líka.
11. Að hætta að vera minn versti óvinur og verða minn besti vinur.
12. Að fara út fyrir þægindahringinn.
13. Að gera hluti til að koma vellíðunarhormónunum af stað, gleðiæfingar eins og Edda Björgvins kallar þær. Já og svo náttúrulega kynlíf, með sjálfum sér eða öðrum, og ræktin.
14. Að vera ég, en ekki vera með grímu (ég var með afar góða grímu megnið af ævi minni) og í feluleik. Að vera hrein og bein, opinská og hreinskilin. Að átta mig á og viðurkenna vanmátt minn og styrkleika mína.
15. Að átta mig á því að andleg rækt er eitthvað sem þarf að stunda alla ævi, alveg eins og líkamsrækt. Að það að ná bata taki tíma og mikla vinnu.
16. Fjölbreytni. Að festast ekki í einhverju of einhæfu eða að gera alltaf það sama. Fjölbreytni gerir hugann minn kátan. Einhæfni gerir mig þunglynda. Mér finnst fátt skemmtilegra en að gera ólíka hluti reglulega.
17. Að notfæra mér öll þau meðferðarúrræði sem mér hafa staðist til boða eða fundið sjálf.
- sálfræðimeðferð á göngudeild geðdeildar (um hálft ár). – fyrri helmingur ársins 2009
- námskeiðið Hópmeðferð við kvíða – breytt hugarfar – að breyta og að sættast, á göngudeild geðdeildar (8 vikur). – ágúst 2009
- Hvítabandið, dagdeild geðdeildar (um 2,5 mánuður, átti að vera lengur en varð að hætta vegna brjósklosaðgerðar). október-desember 2009
- Reykjalundur – febrúar-mars 2011
- Hugleiðslunámskeið (Hjá Hugleiðslu- og friðarmiðstöðinni)- september-nóvember 2011
- Sálfræðimeðferð hjá KMS (á vegum VIRK) – frá mars 2011.
- Ég hef líka verið hjá nokkrum geðlæknum en ekki fundið neina hjálp í því.
- Og síðast en alls ekki síst, ræktin!
Ég hvet alla sem líður illa að rífa sig upp og vinna í sínum málum, það er erfitt, en það mun alltaf borga sig. Að fela eða reyna að hunsa vandamálin er aldrei lausn.
Leiðin í átt að bata getur verið skrykkjótt. Maður tekur nokkur skref áfram, fer svo nokkur skref aftur á bak, tekur jafnvel nokkur hliðarskref, lendir stundum ofan í skurði. En um leið og maður er byrjaður þá alveg sama hve mörg skref aftur á bak eða til hliðar maður tekur, og sama hve oft maður lendir ofan í skurði. Maður fer ekki aftur á byrjunarreit, þó maður gæti stundum haldið það. Það er engin leið nema áfram!
Ég vona að þessi listi hjálpi einhverjum. Við erum misjöfn eins og við erum mörg en vonandi ná einhver atriði til ykkar.
Gangi ykkur vel.
Kærleikskveðja,
Linda Rós
***********************************************
Pistlar á lindaros.com sem ég mæli með:
***********************************************
Þolæfingar virka! | Leið mín að bata
Að ögra sér
Láttu vaða
Allir eru góðir í einhverju – enginn er góður í öllu
Settu þig í 1. sæti
Kærleikskveðja
Verndarhringur
Að blómstra
World Class – 1 ár
Ómerkilegur pappír
Versti óvinur/besti vinur
Ræktaðu líkama OG sál
Góðir punktar
Geðmarkmið
Að tjá sig
Allra besta gjöfin
Gleðiæfingar
18 ára ég
Fólk á stalli
Félagslega fötluð
Sjálfstraust
11 dagar
Að borða
Þakklæti
***********************************************
Viðtöl og pistlar á vefnum:
***********************************************
